როდესაც ადამიანი შფოთავს და დაძაბულია, მისი სუნთქვა ზედაპირული ხდება, მკერდისმიერი. აქედან გამომდინარე, მუცლისმიერ ღრმა სუნთქვაზე გადასვლის ჩვევა შფოთვისა და დაძაბულობის შემცირების სწრაფი ეფექტური საშუალებაა. სუნთქვითი ვარჯიშის ტექნიკა უმარტივესია: უნდა დაჯდეთ კომფორტულად, დაცულ გარემოში, სასურველია მარტო იყოთ, დახუჭოთ თვალები, დაიდოთ ხელი მუცელზე, რათა სუნთქვისას მუცლის მოძრაობა აკონტორლოთ და მიჰყვეთ შემდეგ ინსტრუქციას:
- სუბიექტურად შეაფასეთ თქვენი სიმშვიდის (რელაქსირებულობის) ხარისხი სკალაზე 1-დან 10-მდე და დაიმახსოვროთ რა ნიშნულზე ხართ
- ჩაისუნთქეთ ცხვირით ღრმად, მუცლისმიერად, ისე, რომ გულში ოთხამდე დაითვალოთ. რამდენადაც ხელი მუცელზე გიდევთ, უნდა იგრძნოთ, თუ როგორ გამოიბურცა მუცელი ჩასუნთქვასთან ერთად
- ორ თვლაზე გაააჩერეთ ჰაერი ორგანიზმში
- ოთხ თვლაზე, კვლავ აუჩქარებლად, ნელა ამოისუნთქეთ ჰაერი უკან; მუცელზე დადებულმა ხელმა უნდა იგრძნოს, როგორ შეიწია მუცელი უკან
- ასე გაიმეორეთ რამდენჯერმე
- დააკვირდით თქვენს შინაგან მდგომარეობას და სუბიექტურად კვლავ შეაფასეთ თქვენი სიმშვიდის ხარისხი.
წიგნიდან: ჯანა ჯავახიშვილი (2020) „მედია, ფსიქიკური ჯანმრთელობა და ადამიანის უფლებები”
