პოსტ-ტრავმული აშლილობის სიმპტომების გამოვლენა შეიძლება მოხდეს ტრავმული მოვლენიდან ძალიან მალე, რამდენიმე საათშიც კი, ან რამდენიმე დღეში, იშვიათ შემთხვევებში − 6 თვეში. გასული 12 თვის მანძილზე სხვადასხვა ქვეყნების მაჩვენებლები პტსა გავრცელებისთვის 1.3%-დან 3.6%-მდე მერყეობს. აუცილებელია აღინიშნოს, რომ არ არის აუცილებელი, ადამიანი თავად იყოს სტრესული მოვლენის შემსწრე − სიმპტომები, იშვიათ შემთხვევებში, შეიძლება მძიმე ამბის გაგების შემდეგაც განვითარდეს.

​

პოსტ-ტრავმულ აშლილობას სიმპტომების ძირითადი სამი ჯგუფი გამოარჩევს:

• ზესიფხიზლე − ადამიანი მუდმივად შფოთავს და აქვს საფრთხის შეგრძნება, ადვილად ღიზიანდება, აწუხებს უძილობა და უჭირს კონცენტრაცია;

• შემოჭრები − განმეორებადი, უნებლიე ხატები, ხმები ან სხვა მოვლენები ტრავმული მოვლენიდან, რომელიც უნებლიედ ეჭრება ადამიანს გონებაში; შეიძლება მას ჰქონდეს განცდა, რომ ისევ იქ არის, იმ სიტუაციაში, სადაც ტრავმა გადაიტანა; შემოჭრებს შეიძლება ჰქონდეს სიზმრების სახეც;

• განრიდება − ადამიანი თავს არიდებს იმ ადგილებს, ადამიანებს, საუბრებს, ყველაფერს, რაც ტრავმულ სიტუაციას ახსენებს. 

​

ამ აშლილობის მქონე ადამიანებს ხშირად უჭირთ ტრავმული მოვლენის დეტალების, მიმდინარეობის გახსენება. შექმნილი სირთულეები, როგორიცაა ემოციების მართვის პრობლემები და ძლიერი შფოთვა უარყოფით გავლენას ახდენს მათი ცხოვრების ყველა ასპექტზე, ოჯახში ურთიერთობების გაუარესებიდან სამსაურეობრივი მოვალეობების შესრულების სირთულეებამდე. ხშირად ისინი ჭარბად მოიხმარენ ალკოჰოლსა და სხვა ფსიქოაქტიურ ნივთიერებებს, აწუხებთ დეპრესია და სომატიზებული აშლილობები, რომელიც ფიზიკური ჩივილების სახით ვლინდება.